3 лютага, Мінск /Ігар Хадасевіч - БЕЛТА/. Чэмпіянат Беларусі па футболу 2012 года сярод каманд вышэйшай лігі пройдзе па старой формуле. Як і год таму, каманды вышэйшага дывізіёна правядуць трохкругавы турнір. Такое рашэнне прынята на сённяшнім пасяджэнні выканкама асацыяцыі "Беларуская федэрацыя футбола", перадае карэспандэнт БЕЛТА.
У 22-м па ліку нацыянальным першынстве прымуць удзел 11 каманд, а не 12, як было ў мінулым годзе. У сувязі з фінансавымі праблемамі на старт у кампаніі мацнейшых не зможа выйсці мінскі "Партызан", які ў мінулым сезоне заняў 2-е месца ў 1-й лізе і ў пераходных матчах за права гуляць у вышэйшай лізе абгуляў "Віцебск". У міжсезонні ад фінансавання сталічнага клуба адмовіўся літоўскі бізнесмен Уладзімір Раманаў, а новых спонсараў адшукаць пакуль не ўдалося. Такім чынам, 11 клубаў вышэйшай лігі правядуць у новым сезоне па 30 гульняў, згуляўшы па 3 разы паміж сабой. Старт чэмпіянату краіны намечаны на 24-25 сакавіка, а фініш - на 25 лістапада.
Адкрыецца футбольны сезон-2012 матчам за Суперкубак Беларусі паміж чэмпіёнам барысаўскім БАТЭ і ўладальнікам Кубка краіны "Гомелем". Гэту сустрэчу намечана правесці 6 сакавіка ў мінскім футбольным манежы. У сярэдзіне першага вясенняга месяца адбудуцца чвэрцьфінальныя гульні розыгрышу Кубка Беларусі: "Ліда" - "Нафтан" (Наваполацк), "Брэст" - "Гомель", "Клечаск" (Клецк) - "Нёман" (Гродна), СКВІЧ (Мінск) - "Мінск". Фінальны кубкавы паядынак адбудзецца 20 мая.-0-
|
