Еўрасаюз у адносінах да Беларусі займаецца звядзеннем дробязных разлікаў


Еўрасаюз у адносінах да Беларусі займаецца звядзеннем дробязных разлікаў, не маючы рэальнага ўяўлення аб краіне. Такое меркаванне выказаў карэспандэнту БЕЛТА пісьменнік, старшыня Саюза пісьменнікаў Беларусі Мікалай Чаргінец.

"Пазіцыя Еўрасаюза ў адносінах да Беларусі заўсёды была дваістай. З аднаго боку, яны быццам бы прапануюць нам супрацоўніцтва, з другога - маюць зусім іншыя мэты", - лічыць пісьменнік.

Каменціруючы сітуацыю з пасламі Еўрасаюза, Мікалай Чаргінец падкрэсліў, што Беларусь вельмі правільна паступіла ў сітуацыі, якая склалася. "Любая суверэнная краіна абавязана абараняць сваю пазіцыю, сваё меркаванне, сваю незалежнасць", - лічыць ён.

"Калі некаторыя апазіцыйныя дзеячы дазваляюць сабе складаць спісы краінам Захаду для забароны на ўезд у краіну, і гэтага становіцца дастаткова для таго, каб уводзіць санкцыі, то такая пазіцыя ні ў якім выпадку не з'яўляецца законнай. Гэта парушэнне правоў чалавека", - падкрэсліў ён.

На думку Мікалая Чаргінца, Беларусі трэба разабрацца з тымі, хто працуе супраць дзяржавы на заходнія і еўрапейскія спецслужбы. "Неабходна ў сваю чаргу забараніць гэтым дзеячам, якія называюць сябе апазіцыяй, выезд з Беларусі. Таму што іх дзеянні падрываюць аўтарытэт краіны і накіраваны супраць яе народа", - лічыць ён.

Мікалай Чаргінец лічыць, што сітуацыя, якая склалася ў адносінах з краінамі Еўрасаюза, з цягам часу нармалізуецца. "У Еўрасаюзе адбываецца частая змена корпуса. І кожны новы палітык чамусьці лічыць сёння сваім абавязкам прыйсці і "актыўна" праявіць сябе ў беларускім пытанні, не ўнікнуўшы ў сітуацыю. Аднак палітыка націску і санкцый не патрэбна сучаснаму свету. Рана ці позна там з'явяцца новыя палітычныя сілы, якія інакш паглядзяць на Беларусь", - упэўнены ён.